Euskaltzaindiak Literatura Terminoen Hiztegiaren paperezko bertsioa argitaratu zuen 2008ko ekainean. Orain, Euskaltzaindiaren Informazio eta Komunikazioen Teknologien batzordearen ekimenez, hiztegiaren edukiak datu-baseratu eta Euskaltzaindiaren webgunean kontsultatzeko moduko aplikazio informatikoa sortu du Akademiaren Informatika eta Telekomunikazio zerbitzuak.
1989tik urtero egin ohi duen bezala, Argia astekariak Argia Sariak eman ditu gaur, 2009an euskarazko komunikazioaren arlo ezberdinetan nabarmendu direnen artean.
Sarituak grebaorokorra.info webgunea, Itxaro Borda idazlea, Eriz Zapiain zinegilea, AEK euskarazko alfabetatze erakundea, Agin Rezola irrati errataria eta Txirri, Mirri eta Txiribiton pailazoak izan dira.
Igor Estankonak, Edorta Jimenezek eta Josune Muñozek ‘Desira plazer’ izeneko euskal poesia erotikoaren antologia (1968-2008) aurkeztu dute Txalaparta argitaletxearen eskutik. Liburuaren berbaurrean azaltzen den legez, ‘Euskal Herrian idatzi dan poesia arakatu dabe erotismo bila’. Emaitza, Jimenezen esanetan, ‘altxor-mapa’ bat da.
Hirurogeta hamar idazle inguruk (hoietatik % 40 inguru emakumezkoak) 1968az geroztik euskeraz idatzitako poema erotikoak batu dira liburuan (Iñigo Aranbarri, Paddy Rekalde eta liburua zabaltzen duen Jon Miranderen ‘Oianone’ poema, besteak beste). Tartean, hausnarketarako bide asko ireki dira eta hoiei buruz jardun dute egileek elkarrizketa honetan.
Soziolinguistika Klusterrak Urtxintxa eskolarekin eta Topagunea euskara elkarteen federazioarekin garatu du hain konplexua den gazteen hizkuntz erabileraren fenomenoaren azterketa.
Gazteen erabilerarekin harremanean jartzen den edonori bere jarduna oinarri sendo baten gainean burutzeko baliabideak eskaintzea litzateke helburua.
Bihar abiatuko da Arriaga Antzokiko Literatura eta musika euskaraz programa, Xabier Lete idazlearen eta Joxan Goikoetxea soinu-jolearen emanaldiarekin. Euskadi Saria jaso duen Egunsentiaren esku izoztuak lanean oinarrituko da Lete errezitaldian. Beste bi emanaldi ere izango dira euskara sustatu eta musika eta olerkia uztartzea helburu duen programan. Martxoaren 16an Bernardo Atxaga eta Juan Carlos Perez igoko dira oholtzara, eta maiatzaren 10ean Itxaro Borda, Pier Paul Berzaitz eta Xanet Arozena. 20:00etan izango dira hitzordu guztiak.
Jakin ezazu Barriola eta Urruzuno deklamazio-sariak martxan direla. Bi deialdi hauetan lanak aurkezteko epea martxoaren 3ra arte, egun hau barne, egongo da irekita. Deialdiei buruzko beste zehaztasunen bat ezagutu nahi baduzu, www.ulibarri.info web- guneko NOLEGA atalera jo dezakezu, han aurkituko dituzu jakingarri guztiak.
Batzutan zer oparitu ez dakigula gabiltza (ez badugu telebistarik ikusten batik bat) eta ideia bat honako hau izan daiteke: Elhuyar Zientzia eta Teknologiaren Hiztegi Entziklopedikoa.
Haize zakarrak eta hotza ez ziren inor uxatzeko gai izan. San Tomas azokara jendetza bildu zen Bilbon. Areatzako kaian, pasealekuan eta Plaza Barrian zeuden 296 erakusmahaietan ia ezinezkoa zen ezer ikustea. Elkarri bultzaka zebiltzan guztiak.
Begiratu bai, galdetu ere bai askotan, baina erosi gutxi. Hala zioten saltzaileek. Adineko jendea zen, gehienbat, zerbait erosten zuena. Indaba poltsatxoa eskutan hartuta ikus zitekeen bat edo beste. 14 eta 20 euro artean zeuden, saltzailearen arabera, bai Gernikakoa bai Tolosakoa. 4 eurotan saltzen zituzten txorizotarako piperren txortak. Irina, berriz, 11 eurotan.
Zortzi ahots eta 212 bertso, milaka txaloz inguratuta. Osagai xume horiekin festa ederra, ikuskizun borobila, mamitu zuten atzo (2009-12-13) Barakaldoko BECen Bertsolari Txapelketa Nagusiko protagonistek. Eta, bukaeran, txapelak jabe berria ezagutu zuen: Maialen Lujanbio.
60ko hamarkadatik 2000ra arte euskal kantagintzak emandakoa jaso eta bildu du BERRIAk www.badok.info atarian, eta gaurtik aurrera egongo da ikusgai. Jon Eskisabel kazetaria aritu da, batez ere, informazioa biltzen eta atontzen, eta Kepa Sarasolak egin du webgunea teknikoki. “Hemen ez dago dena, baina abiapuntu sendoa eta mamitsua da”, adierazi du Eskisabelek. “Azken batean, helburua euskal musika osoa jartzea da”, esan du Martxelo Otamendi BERRIAko zuzendariak.
Escrito por pilarikazuriaga 
