Oheko inkomunikazioari buruzko antzezlana

Patxi Zubizarretak iaz irabazi zuen antzerkiko Donostia Hiriko Kutxa Literatur Saria, Ohe deseginak lanarekin. 40 urteren bueltan dabiltza antzezlaneko bi pertsonaia nagusiak, Teresa eta Migel. Semea Edinburgora bidali berri dute ingelesa ikastera, eta etxera itzuli direnean, bakarrik sentitu dira.

Oporretan irakurtzeko aproposa!

Liburu bat: Piraten uhartea

Nobelak pirata euskaldun batzuek karibe aldean izango dituzten gorabeherak kontatzen ditu. Beraiekin hamaika abentura biziko ditu irakurleak: espetxe ihesak, urrezko altxor baten lapurreta…

12-14 urte bitarteko gazteei zuzendurik dagoen sail hau osatzen duten gainontzeko liburuak ikusteko klikatu hemen. Liburu bakoitzaren laburpena irakurtzeko aukera ematen du.

“Zazpi etxe Frantzian” liburu berria kaleratu du Atxagak

Zazpi etxe Frantzian izenburupean kaleratu du Bernardo Atxagak bere eleberri berria Pamiela argitaletxearen eskutik. Gaur egin dute aurkezpena, Donostian, Koldo Mitxelena Kulturunean.

Afrikan kokatu du eleberria Asteasuko (Gipuzkoa) idazleak, eta bere hitzetan “komizitate beltza” erabili du “gizakiaren alderik zital eta txarrena” islatzeko.

Euskaraz, galizieraz, katalanez eta gaztelaniaz kaleratu dute aldi berean. Aurki portugesera itzuliko dute, eta etorkizunean beste hizkuntzetara itzultzea ez dute baztertzen.

Amilami. Laminen istorioak

Juan Kruz Igerabidek Amilami protagonista nagusia duen nobela idatzi du.

Misterioa, intriga, jakin-mina… lamien inguruko informazioa azaltzeko erabili dituen tresnak izan dira nobela honetan.

Horrela, hasiera-hasieratik aurkeztuko zaigu narrazioko protagonista nagusia, lamia gazte bat, Amilami, eta ondoren lamien ezaugarriak, trebeziak, ohiturak, jokabidea… eta beste mila kontu gehiago ezagutzeko parada izango dugu Amilamiren abenturetan zehar. Baina, ez horiek bakarrik, kontu horiekin batera lo-kantak, esaerak eta tradiziotik harturiko hainbat eta hainbat elementu ere aurkezten baitizkigu Igerabidek. Osorik irakurri nahi baduzu, klikatu hemen.

Haur literatur gida

Laster abenduko oporrak datoz eta batzuk irakurketarako liburuak erostekotan izango zarete. Zuen ikasleentzako edo seme-alabentzako liburuak aukeratzeko orduan erabilgarria izango zaizue helbide hau; izan ere, Mondragon Unibertsitateak duen bilduma hau horretarako aproposa da, hainbat literatur gida biltzen ditu eta (batzuk gure materialaren artean ere badaude).

Sei ipuin eta sei hilketa astebetean irakurtzeko liburua

Munduko hainbat txokotan -baita Euskal Herriko herrixka batean ere- girotutako sei hilketa azaltzen dituzten kontakizunak dira. Hilpuinak du izenburua eta DBHko ikasleentzako idatzi du Joxemari Urteagak.

Zortzi urtetik gorakoentzat

Aitona eta amona udalekuetan du izenburua eta Joxantonio Ormazabalek irakurle hasiberrientzat egindako lana da. Aitona-amonak etxeko txakurrarekin abiatuko dira Libe dagoen udalekuetara. Autostopean egingo dute bidaia.

Gazteei zuzendutako nobela umoretsua

Elkar argitaletxeak Antton Olanoren itzulpenari esker euskaraz kaleratu du Bai baina ez baina bai. Irakurle gazteenei ez zaie damutuko berau irakurtzea, oso umoretsua da eta.

Hamalau urteko mutila da kontalaria. Bere ikasgelakoekin ikasturte-amaierako bidaia egitera doa Mallorcara. Han buruhauste ugari izango du.